Лэгэнтэй уонна Аана Баhылаайаптар алта оҕолоохторо: Огдооччуйа, Балбаара диэн кыргыттар уонна түөрт уол. Кырдьаҕастар ахталларынан, уолаттар төрдүөн бөдөҥ-садаҥ, көнө, үрдүк уҥуохтаах эбиттэрэ үhү.   

 Васильев Василий Иннокентьевич 1903 с. Дьөккөн нэhилиэгэр төрөөбүт. «Коминтерн» холкуос чилиэнэ. 1943 с. бэс ыйын 12 күнүгэр аармыйаҕа ыҥырыллыбыт. 1944 с. балаҕан ыйын 6 күнүгэр сураҕа суох сүппүт.

Мин хос-хос эhэм Васильев Петр Иннокентьевич 1905 с. Дьөккөн нэhилиэгин Алаас диэн кэрэ айылҕалаах сиригэр  төрөөбүт. Эмиэ «Коминтерн» холкуос чилиэнэ. Сэриигэ 1942 сыллаахха ынырыллыбыт.  Ол сыл ахсынньы 7 күнүгэр кыргыhыыга өлбүт. Көмүллүбүт сирэ -- Смоленскай уобалас Аристово дэриэбинэтэ. Полевой почтовай станцията – 38.

       Кыыhа Васильева Варвара Петровна маннык ахтара:

«Мин сэрии саҕана уончалаах оҕо этим. Аҕабытын сэриигэ 1942 с. ыҥырбыттара. Ийэм, дьонум наhаа аймаммыттара. Балтым Бороскуобуйа биирин саҥа туолан сылдьара. Онон ону-маны өйдөөбөтө. Мин аҕабын ыытымаары сайыhан, наhаа ытаабытым. «Оҕом наhаа ытыыр, арааhа, өлөрбүн биллэ быhыылаах», -- диэбит этэ. Сэриигэ аттаналларын көрбөтөҕүм. Миигин ытыырым иhин, хоско хаайан кэбиспиттэр. Ол саҕана биhиги Булгунньахтаахха олорорбут. Сэриигэ баран иhэн, ис тиибигэр ыалдьан өлө сыспыт үhү. Тиийэн баран уhаабатах сурахтааҕа. Өлбүтүн туhунан биллэрии кэлбэтэҕэ. Көннөрү сурах быhыытынан истибиппит. Сэрии кэмигэр булчут дьону кытта олорон абыраммыппыт. Онтон атын хоргуйан өлүө этибит. Аҕам барарыгар табаарыстарыгар, урууларыгар: «Икки кыра оҕолорбун хааллардым. Көрө-истэ сылдьаарыҥ», -- диэбит.

  Васильев Дмитрий Иннокентьевич 1913 с. Дьөккөн нэhилиэгэр Эчичээҥҥэ төрөөбүт. «Киров» холкуос чилиэнэ. 1941 сыллаахха аармыйаҕа ыҥырыллыбыт. 1942 с. бааhыран төннөн кэлбит. Ленинградскай фроҥҥа, Крымскай уобаласка сэриилэспит. Иккис группалаах инбэлиит. Бойобуой мэтээллэринэн наҕараадаламмыт. Холкуос, сопхуос араас үлэтигэр үлэлээбит. 1978 сыллаахха өлбүт.

                Васильев Сергей Иннокентьевич 1916 с. Дьөккөн нэhилиэгэр Эчичээҥҥэ төрөөбүт. «Киров» холкуос чилиэнэ. Аармыйаҕа 1942 сыллаахха ыҥырыллыбыт. Ленинград оборуонатын кыттыылааҕа. 133-с стрелковай полк 112-с артиллерийскай отделениетыгар сулууспалаабыт. Нева өрүhү туорааhыҥҥа атаҕар бааhыран, госпитальга сыппыт. Үлэ фронугар ыытыллыбыт. 1946 сыллаахха дойдутугар кэлбит. Бойобуой наҕараадалара: Аҕа дойду сэриитин II степеннээх уордьана, «Ленинград оборонатын иhин», «Германияны Кыайыы иhин» мэтээллэрдээх. Холкуос, сопхуос араас үлэтигэр үлэлээбит, тыраахтырыыстаабыт. 1980 сыллаахха өлбүт.

Аҕа дойду сэриитигэр элбэх да киhи өлбүтэ,

Хос эhэм Бүөтүр төннүбэтэҕэ дойдутугар.

Эбэм кэпсиирэ ийэбэр: "Аҕам сэриигэ барарыгар

Баттахпытын кырыйан, кумаахыга суулаабыта,

Сэрэнэ соҕус  тутан, түөһүгэр уктубута.

Барыбытын кууhан-уураан, сыллаан,

 Эрчимнээхтик тахсан барбыта..."

Икки кыыhа, кэргэнэ сайыһа хаалбыттара.

Эргиллиэ диэн эрэллээх кэнниттэн көрөн хаалтара.

Ол сэриигэ тиийэн, Ийэ сирин көмүскээбитэ,

Бэйэтин олоҕун толук ууран, кыайыы туһугар охтубута.

Аны сэрии буолбатын, хаhан да хатыламматын,

Оҕо тулаайах хаалбатын, ийэ хараҕа ууламматын!

                                                                                                                  Сиэнэ М.Н. Семенова суруйбут.

                                                                      Настя Попова, Х  кылаас,

“Сыккыс» лааҕыр, Кэбээйи.