Уопсастыба

От ыйын 2 күнүнээҕи араадьыйанан биэриибит бу тирэх пууннар үлэлэригэр ананна, итиэннэ харысхал сиэккэтин өрөөччүлэр күннээҕи үлэлэрин таһынан уолаттарбытыгар анаан кылынан туһалаах харысхал оҥоһуктары, сылгы тириитинэн олбохтору оҥорон ыыталыыр үлэлэрин сырдаттыбыт. Новоазовск куоракка тэриллибит Саха Сиринээҕи тирэх пуун салайааччыта, бу күннэргэ дойдутугар кэлэ сылдьар Петр Иннокентьевич Лебедев, байыаннай дьайыы бэтэрээнэ Филипп Иванович Христофоров, Дьокуускай куоракка үлэлиир сиэккэни өрөөччүлэр “Боевые шелкопряды Якутии” хамсааһынтан Тамара Дмитриевна Попова итиэннэ “Добровольцы” волонтердар түмсүүлэриттэн Татьяна Петровна Прохорова быһа биэрии ыалдьыттарынан буоллулар.  

Урукку сылларга нэһилиэк баһылыгынан итиэннэ атын да салайар үлэлэргэ буспут-хаппыт Петр Лебедев тирэх пуун үлэтин сүрүн соруктарын туһунан кэпсээтэ. Кини Саха Сириттэн харысхал сиэккэлэри итиэннэ хас биирдии боотурга анаммыт бэлэхтэри, харысхаллары ыыталларын барытын туталларын туһунан иһитиннэрбитин, сиэккэни өрөөччү ийэлэрбит, ытык кырдьаҕастарбыт, үлэ бэтэрээннэрэ астына, үөрэ иһиттилэр. Петр Иннокентьевич, чуолаан, сахалыы харысхаллар итиэннэ кылтан өрүллүбүт олбохтор уонна да атын маллар бары туһалаахтарын этэн туран, Саха Сирин харысхал сиэккэни өрөөччүлэригэр махтал тылларын анаата:   

-- Эһиги тугунан да кэмнэммэт үтүө санаалаах үлэҕитинэн биһиги бары киэн туттабыт уонна эһиги өрөр сиэккэлэргитин, бэлэхтэргитин барытын Анал байыаннай дьайыыга сылдьар дьоммут туталлар. Харысхаллары уонна сылгы кылыттан, тириититтэн оҥоһуллубут бэлэххит хас биирдиилэригэр тиийэр. Уолаттарбыт эһиги сылаас илиигитинэн, үтүө сүрэххититтэн анаан оҥорбут  харысхалларгытын түөстэригэр укталлар. Саха Сириттэн сылдьааччылар, омугуттан тутулуга суох бары биир сомоҕо буолаллар. Кэнники кэмҥэ саха харысхала, Алгыс тыллар туһалыылларын билэн, урукку өттүгэр улаханнык болҕомто уурбат эбит буоллахтарына, билигин уолаттарбыт саха итэҕэлигэр сүгүрүйэр буоллулар. Барыгытыгар боотурдар ааттарыттан махталбын тиэрдэбин уонна  өссө түмсүүлээх уонна сарсыҥҥы күҥҥэ эрэллээх буолуоҕуҥ, - ити курдук, Петр Иннокентьевич араадьыйаны истээччилэргэ баҕа санааларын тиэртэ.

Онтон Өлөөн улууһуттан төрүттээх “Хоттабыч” позывнойунан биллэр ыалдьыппыт, Анал байыаннай дьайыы бэтэрээнэ боотурдарга дойдуларыттан кэлэр баһыылкалары хайдах тиэрдэллэрин туһунан  сиһилии билиһиннэрдэ:

- Анал баһыылкалары нэдиэлэҕэ биирдэ эбэтэр иккитэ тутабыт. Кэлбит баһыылкалары барытын анал сурунаалга суруйан бэлиэтээн иһэбит. Салгыы барытын чаастарынан уонна хайысхаларынан туспа наардаан, чаастар хамандыырдарыгар биллэрэбит. Баһыылкаларбытын тиксэрэргэ  күннээҕи балаһыанньаны билэн баран, чаастарга тиийэр хайысхаларынан анал маршруттары оҥоробут. Бу үлэ барыта байыаннай чаас салалтатын  уонна Саха Сирин кытта анал сөбүлэһии кэнниттэн биирдэ ыытыллар. Онон, кырдьык, баһыылкалары тутатына тиэрдии табыллыбат эрээри, маршруттары быһаарыы кэнниттэн хайаан да баһыылкалары тиксэрэр сорукпутун булгуччу күнүс да түүн да буоллун,  толоробут. Онон уолаттарбыт анабыл баһыылкаларын хайаан да туталлар, - диэн итэҕэтиилээх тылларынан этиитин түмүктээтэ.

Сиэккэни өрөөччүлэр “Боевые шелкопряды Якутии” хамсааһынтан Тамара Попова, итиэннэ “Добровольцы” хамсааһын волонтера  Татьяна Прохорова  баҕа өттүнэн түмсүүлэргэ киирэн, биир дойдулаахтарыгар тугунан эмэ көмөлөспүт үтүө санаалаах бу харысхал сиэккэлэри өрөллөрүн туһунан кэпсээтилэр. Түмүккэ Тамара Дмитриевна сылгы кылыттан өрбүт оҥоһуктарын тирэх пуун улэһиттэригэр бэлэх уунна.

Дьэ, ити курдук, "Дойдум тэтимэ" биэриигэ тирэх пуун эдэр үлэһиттэрэ итиэннэ харысхал сиэккэни өрөөччү ытык дьоммут көрсүһэн, сыалларын-соруктарын, сырдык баҕа санааларын сэһэргээтилэр.

Альбина ПАВЛОВА