Сэрии уонна үлэ бэтэрээннэрин Сэбиэтин бэрэссэдээтэлэ Вильям Иванов эппитинэн, билиҥҥитэ 8 мөл. солк. кэриҥэ үп хомуллубут. «Улуу бырааһынньыкка диэри олус кыра кэм хаалла. Үбү хомуйууга үлэни түргэтэтиэххэ наада», – диэн бэлиэтээтэ Вильям Иванов. Кыайыы пуондатыгар мунньуллубут харчы сэриигэ өлбүт буойуннар ааттарын үйэтитиигэ, бэтэрээннэр хамсааһыннарын өйөөһүҥҥэ, бэтэрээннэргэ анаан үбүлүөй тэрээһиннэрин ыытыыга көмө быһыытынан туһаайыллыаҕа.

Петр Гоголев СӨ бар дьонун дьокутаатыгар Алиш Мамедовка, СӨ Конституционнай суутун бэрэссэдээтэлэ Александр Ким-Кимэҥҥэ уонна сенаторга, Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин бэрэссэдээтэлин солбуйааччы Александр Акимовка бу үтүө санаа эстафетатын тиэрдэрин иһитиннэрдэ.

Ил Түмэн бэрэссэдээтэлэ бэйэтин ыҥырыытын маннык быһаарда: ”Кыайыы-75” пуондаҕа үбү хомуйууга үтүө санаа эстафетата тэтимин ылыахтаах. Хас биирдиибит онно илдьитинэн буолуох тустаах. Бэйэ кылаатын эрэ киллэрии ситэтэ суох. Биһиги бары тэрийсэр кыахтаахпыт. Кэллиэгэлэрбиттэн биирдэстэрэ бөдөҥ хаһаайыстыба салайааччытынан буолар, иккиһэ юристар идэтийбит уопсастыбаларын баһылыга, үһүс — Москваҕа Саха сириттэн биир дойдулаахтарын түмүүгэ сүүнэ уопуттаах. Ону таһынан, Судаарыстыбаннай Мунньах (Ил Түмэн), үрдүкү бэрэстэбиитэллээх уорган быһыытынан, өрөспүүбүлүкэ дьокутааттарын куорпуһун ортотугар тэрээһин миссиятын бэйэтигэр сүгүөҕэ”.

Норуот дьокутаата Петр Гоголев манныгы бэлиэтээтэ: «Мин ХИФУ юридическай факультетын (СГУ историко-юридическай факультетын) бүтэрбиттэргэ туһаайан этиэхпин баҕарабын. Өрөспүүбүлүкэҕэ 2020 сылга төрөөбүтэ 100 сыла бэлиэтэнэр Аҕа дойду Улуу сэриитин кыттыылааҕа Михаил Михайлович Федоров үгүс өҥөтүнэн биһиги идэбитин ылбыппыт. Онон  өрөспүүбүлүкэҕэ үрдүк юридическай үөрэхтээһини төрүттээбит Учууталбыт туһунан кинигэни таһаарыыга харчы хомуйар иэс­тээхпит».

“Кыайыы-75” пуондаҕа тус кылаатын уган, хас биирдии киһи сэрии сылларыгар биһиги байыастарбыт уонна тыыл үлэһиттэрин улуукан хорсун быһыыларыгар ытыктабылын биллэрэр. Хайа да киһи бэйэтин баҕатынан харчыны угуон сөп. Саха сирин Баһылыга Айсен Николаев “Кыайыы-75” Өрөспүүбүлүкэтээҕи пуондаҕа бэйэтин харчытын киллэрбитэ уонна үбү хомуйууга кыттыыны ыларга ыҥырбыта. Ил Дархан бачыыма өйөннө, өрөспүүбүлүкэ тэрилтэлэрэ уонна олохтоохторо уопсай үтүө дьыалаҕа кылааттарын киллэрэллэр.